Священномученику Киприану

(читаются только по благословению духовника)

Тропарь, глас 4-й: И нравом причастник, и престолом наместник апостолом быв, деяние обрел еси, Богодухновенне, в видения восход: сего ради слово истины исправляя, и веры ради пострадал еси даже до крове, священномучениче Киприане, моли Христа Бога спастися душам нашим.

Кондак, глас 1-й: От художества волшебнаго обратився, богомудре, к познанию Божественному, показался еси миру врач мудрейший, исцеления даруя чествующим тя, Киприане со Иустиною: с неюже молися Человеколюбцу Владыце спасти души наша.

Икос: Целений твоих, святе, дарования мне низпослав, и недугующее мое сердце гноем греховным молитвами твоими исцели, яко да слово пения от скверных устен моих ныне принесу ти и воспою болезни твоя, яже показал еси, священномучениче, покаянием добрым и блаженным и Богу приближающимся. Того бо удержан рукою, направился еси, яко по лествице, к Небесным, непрестанно моляся спасти души наша.

Молитва: О, святый угодниче Божий, священномучениче Киприане, скорый помощниче и молитвенниче о всех к тебе прибегающих. Приими от нас недостойных хваление наше, и испроси нам у Господа Бога в немощех укрепление, в болезнех исцеление, в печалех утешение и всем вся полезная в жизни нашей. Вознеси ко Господу благомощную твою молитву, да оградит нас от падений греховных наших, да научит нас истинному покаянию, да избавит нас от пленения диавольскаго и всякаго действия духов нечистых и избавит от обидящих нас. Буди нам крепкий поборник на все враги видимыя и невидимыя. Во искушениях подаждь нам терпение и в час кончины нашея яви нам заступление от истязателей на воздушных мытарствах наших. Да водимыя тобою достигнем Горняго Иерусалима и сподобимся в Небеснем Царствии со всеми святыми славити и воспевати Пресвятое имя Отца и Сына и Святаго Духа во веки веков. Аминь.